Ginaeauman nga makaangkon it mabahoe nga pagtaas sa presyo it mga produktong petrolyo sa masunod nga domingo bangud sa naga-grabe eon man nga tensyon sa Middle East.
Base sa pag-estimate it sangka source sa industriya it langis, posibleng tumaas ro presyo it:
-Diesel: ₱9.50 hasta ₱10.50 kada litro
-Gasolina: ₱3.50 hasta ₱4.50 kada litro
Suno sa source, nagtueod sa pagtaas it presyo it langis sa world market ro naga-grabeng away matapos ro pag-atake it Iran sa mga komersyal nga barkong naga-agi sa Strait of Hormuz ag ro baeos nga pag-atake it Estados Unidos sa mga military asset it Iran.
Dugang pa kara, nakaapekto man sa presyo ro pagkabaeaka sa posibleng pagka-delay it suplay it langis, pagbawas it trapiko it mga barko sa Strait of Hormuz, pagbaeabag it US sa mga barkong paagto ag halin sa mga pantalan it Iran, ag pagpapanaog it diesel exports it Russia.
Samtang, gin-anunsyo ni Pangueong Ferdinand Marcos Jr. ro pagpaeapad it United Package for Livelihoods, Industry, Food, and Transport (UPLIFT) program agud nga mabuligan ro mga pamilyang maaapektuhan it pagtaas it presyo it langis.
Sa idaeum it programa, 7.5 milyong kabaeayan ukon masobra sa 37.5 milyong Pilipino ro makabaton it ayuda. Kaibahan kara ro 3.5 milyong benepisyaryo it Pantawid Pamilyang Pilipino Program (4Ps) ag Walang Gutom Program, nga magabaton it sang beses nga dugang nga ayuda nga hasta sa ₱2,000.
