KALIBO, Aklan — Haum ro pamunuan it D’Mall sa Boracay nga mag-install it mabahoe nga flood control water pump unit bilang kabahin it tikang agud masolusyunan ro pauman-uman nga pagbaha sa shopping center sa Barangay Balabag, Malay.
Raya ro ginpahayag ni First District Board Member Apolinar Cleope matapos ro ginpatigayon nga legislative inquiry it Sangguniang Panlalawigan it Aklan pinaagi sa Committee on Tourism, Arts and Culture, Committee on Laws, Rules and Ordinances, ag Committee on Public Works, Housing, Land Use and Urban Relocation.
Base suno kana sa technical assessment nga ginpresentar sa inquiry, natukiban nga nagasirbing catch basin ro D’Mall, rason nga nagatipon ro tubi-uean antes raya nga ginadaea sa drainage system it Tourism Infrastructure and Enterprise Zone Authority (TIEZA).
Bilang solusyon, nagpahayag ro management it D’Mall nga plano nanda nga magbakae ag mag-install it mabahoe nga water pump unit agud mapadasig ro pagbomba it tubi paagto sa drainage system it TIEZA.
Tuyo kara nga pinaagi sa nasambit nga tikang, mabuhinan ro pagbaha sa lugar ag maprotektaran ro mga negosyo, residente, ag mga turista nga nagabisita sa isla it Boracay.
