NABAS, Aklan—Sangka residente ro nagdangop sa bombo radyo agud nga ireklamo ro babuyan it andang kaeapitbaeay bangud nga pasakit kanda ro sitwasyon tuga it mabahong hugum nga ginatuga kara .
Suno kay Arlene Saron it Brgy. Buenasuerte, Nabas nga partikular nanda nga ginareklamo ro ginabagsakan it buhi nga baboy maeapit sa andang lugar nga ginapanag-iyahan ni certain Ipe Amacio, residente it Brgy. Poblacion, Nabas bangud nga mag-eowas nga dis oras it gabi-i ro pag-deliver nga naga disturbo sa andang katueugon ag pagpahuway hay naga-aywan pa raya it mabaho nga hugum.
Ginapa tinir anay sigon sa tangkae ro mga baboy it mga sang domingo antes nga iga deliver sa mga merkado publiko.
Mag-eowas sa mabaho nga hugum, naga amat amat man sigon ro pag abu it mga bangaw nga peligroso sa ikamayad nga eawas bangud nga naga dapo raya sa andang mga pagkaon.
Angot kara, nagdangop eon sigon imaw sa andang barangay council nga gin refer man sa munisipyo it Nabas.
Ro ana sigon nga reklamo hay sa lamesa eon it alkalde ag ginatun-an ro nagakaigo nga tikang eabi pa ag natukiban nga owa it permit ro nasambit nga babuyan.
Ko una sigon hay owa it problema ro pag alaga it 3 baboy it andang kaeapit apang matapos nga magbutang it extension ag madugangan ro numero it mga baboy hay indi eon nanda matakuran ro baho eabi eon kon indi sanda makalimpyo it tangkae.
