Para sa manaba nga kapueungan it kongreso, importante nga masabat it Pilipinas ro panawagan it World Health Organization ukon WHO nga magpatuman it mga polisiya para mabawasan ro pagkonsumo sa asin it mga Pilipino.
Raya ro ginpahayag ni AnaKalusugan Party-list Representative Ray Reyes matapos nga magguwa ro report ko October 2022 nga naga abot eon sa 4,113 MG ro dietary sodium intake it mga tawo sa Pilipinas nga masobra sa dapat hay kurang sa 2,000 MG of sodium nga pwedeng ikonsumo it sangka tawo kada adlaw.
Ginpamilit ni Representative Reyes, kinahangean raya nga maaksyunan agud nga maproteksyunan ro ikamayad nga eawas it mga pumueuyu ag malikawan ro tsansa nga dapuan it sakit kapareho it high blood pressure, heart disease, stroke, ag tempranong pagkamatay.
Kadungan kara, ginpasiguro ni Reyes nga mataw-an it konsiderasyon ro ikamayad nga eawas it mga pumueuyu sa pagplastar it gobyerno it mga polisiya eabi eon sa pagtaeana it pondo angot sa implementasyon it universal health care.
Igasueong man sigon nanda ro mga proposed bill agud nga makaangkon it libreng medical checkups ag pagbo-oe it value added tax sa mga maintenance medicines.
