KALIBO, Aklan—Ginareklamo makarun it mga residente ro madaeom nga eapok sa daeanon nga sakop it Brgy. Fulgencio Norte, Balete.
Bangud raya hay nagatuga it kabudlay ag perwisyo sa mga naga-agi nga pumueoyo ag behikulo.
Suno kay Punong Barangay Luslyn Beltran it Brgy, Fulgencio Sur ag Norte, nakaabot eon sa andang igtueopangod ro sitwasyon it karsada antes pa raya nag-eutaw sa social medi matapos nga ipost it sangka netizen.
Suno kana, amat-amat eon nga nagahimo it tikang ro opisyales it barangay agud nga masolusyonan ro problema.
Apang, bangud sa kakueangan it pondo rason nga indi man raya insigida nga maisa-ayos.
Aminado man imaw nga kinahang-ean it andang barangay ro bulig halin sa lokal nga gobyerno it Balete agud daeayun eon nga maaksyunan ro problema.
Ginasugid nga naga-abot sa haeos tatlong kilometro pa it andang barangay road ro bukon pa it kongkreto.
Angot kara, nag-apela man imaw it pag-intindi sa mga pumueoyo samtang owa pa natapos ro konstruksyon.
