KALIBO, Aklan—Pagapapanaugan it multa ro sin-o man nga mapamatud-an nga nagapilak it basura sa pampublikong lugar.
Raya ro naging paandam ni Kalibo vice mayor Cynthia dela Cruz kasunod it pagpasa it sangka resolusyon sa konseho nga hugut nga nagapatuman sa dati eon nga ordinansa angot sa “no littering” ukon pagkalhit it basura maskin siin eamang.
Raya hay bilang pagsunod suno kana sa Republic Act 9003 ukon Ecological Solid Waste Management Act of 2000.
Samtang, sangka resolusyon man sigon ro andang ginpasa sa andang session ko nagtaliwan nga adlaw angot sa nagahilapit nga selebrasyon it Kalibo Sto. Nino Ati-Atihan Festival 2024 nga mag-eowas sa pagbawae sa pagpanigarilyo ag pagbitbit it mga debotelyang ilimnon kamana man ro bawae sa pagdaea it backpack hay hugut man nga ginabawae ro pagpilak it basura sa pampublikong lugar, kapareho it mga karsada, sidewalk, kanae, plaza, ag mga establisyemento.
Maskin suno kana nga may tagalimpyo ro lokal nga gobyerno it Kalibo, apang kon matiempuhan hay posibleng magapangatubang sa nagakaigo nga multa.
Base sa andang experiensiya, sangkaterbang basura ro ginahakot kada gabi-i sa festival zone ag iba pang lugar sa banwa it Kalibo bangud sa kawad-an it disiplina it mga tawo.
Suhestiyon nana nga itago sa boesa ukon bag ro mga basura agud nga makalikaw sa multa.
Sa pihak nga parte, nagpaandam dugang ro bise alkalde nga mas mabug-at pa gid nga penalidad ro nagahueat sa mga owa nagasunod sa tamang pagseparar it mga basura.
Raya hay matapos nga mataeupangdan nga maskin nga gin-implementar eon ro ‘no segregation, no collection’ policy ko nagtaliwan nga Nobyembre 30 it makaron nga dag-on hay maabu gihapon ro naga-eabag.
