KALIBO, Aklan—Ginkumpirma ni Madalag Mayor Al Dindo Gubatina nga namatay ro andang kauna-unahang kaso it Coronavirus Disease 2019 ukon COVID-19 ko Disyembre 24.
Ro pasyente hay sangka 55-anyos nga babayeng cancer patient.
Suno sa alkalde, ko buean it Nobyembre hay nag-adto sa syudad it Iloilo ro pasyente para magpaidaeom sa radiation therapy apang antes sigon raya nag-uli sa Aklan hay gin-abisuhan anay raya nga magdiretso sa ospital agud matueopangdan ro pilang procedure antes mag-uli sa andang baeay.
Bangud kara, gilayon sigon it pasyente nga magdiretso sa sangka pribadong ospital sa banwa it Kalibo kung siin dikara eon natukiban nga nagpositibo imaw sa deadly virus matapos nga ipaidaeom sa test.
Bilang pagsunod sa protocols hay ginsaylo sa COVID ward it Aklan Provincial Hospital ro pasyente apang namatay raya ko bisperas it Paskwa.
May kaangtanan kara, insigida sigon sandang nagpaidaeom it contact tracing sa pamilya ag mga direktang nakasalamuha it pasyente.
Sa mayad nga swerte hay nagnegatibo man sigon ro mga raya sa sakit kamana man nga ginpaidaeom gihapon sa 14 days mandatory quarantine.
Sa pihak kara, nagapati man ro opisyal nga bukon it sa andang banwa nabuoe it pasyente ro virus rason nga ginlaygayan kara ro anang pumueoyo nga indi magkahadlok ag padayun eamang nga magsunod sa health and safety protocols para makalikaw sa COVID-19.
