KALIBO, Aklan—Uman nga nagpatuman it regionwide lockdown ro Madrid, Spain.
Raya hay kasunod it uman nga paglobo ko kaso it mga tinamaan it coronavirus disease 2019 ukon Covid-19.
Suno kay Bombo International Correspondent Jannette Berdonar Dizon sa Madrid, Spain nga nagasilinangag makaron ro mga opisyal it gobyerno sa nasambit nga nasyon bangud sa tikang nga ginahimo it pila ka mga pamunuan it syudad kon sa siin bukon it pabor kara ro ibang opisyales bangud sa uman nga pagbagsak it andang ekonomiya nga amat-amat eon kunta nga nakakabangon halin kat ginbuksan ro industriya it turismo kamana man ro ibang negosyo.
Ginpahayag dugang ni Dizon nga ginpaidaeom sa lockdown ro napueong ka sydudad sa Madrid halin ko Oktobre 9 hasta it 20 bangud nga uwa naganaba sa 800 ro naililistang kaso kada dominggo.
Ginakabig eon sigon raya nga second wave it Covid-19 infection kon sa siin ro ginatumod nga rason kara hay ro inde mapunggan nga pagtipon-tipon it mga pumueoyo maskin nga ginabawaean it gobyerno.
Uman nga napuno suno kana ro mga ospital it mga covid patient ag kabaeanan sa mga raya hay mga magueang.
Ro inde masarangan nga tatapon sa mga pasilidad hay ginapaidaeom eon lang sa home quarantine ag ro pasyente mismo ro nagapang-imbita it mga kaabyanan agud nga inde mabatyagan ro stress sa pag-angkon it nasambit nga deadly virus.
