Sangka maeahaeon nga brand it ice cream sa China ro gina-kuwestiyon makaron it mga bumaeakae bangud nga nabulgar nga owa raya nagakatunaw maskin nga sindihan pa it lighter!
Kilaea sa China ro “Chicecream” bilang maeahaeon nga local ice cream brand.
Bangud sa mataas nga presyo kara, gintawag raya it mga Chinese netizens nga “Hermes of ice cream”.
Umpisa nga ginlunsar sa merkado ro Chicecream ko 2018, pilang beses eon raya nga naging kontrobersiyal ag sambilog sa mga rason hay ro anang presyo.
Nagabalor it 66 Yuan ukon katumbas it 550 pesos ro sangka popsicle it Chicecream apang ginasakdag sa gihapon it mga pamatan-on bangud nga ginakabig ka nga “sosyal” kon nagakaon kara.
Makaron nga Hulyo 2022, uman nga nabutang sa kontrobersiya ro Chicecream bangud nga may nagakalhit nga video sa mga Chinese social media websites kun sa siin owa nagakatunaw ro popsicle maskin nga aywan raya sa mainit nga kusina sa sueod it sang oras.
Makita sa viral video nga imbes maging liquid ro popsicle, nagapabilin ro ice cream sa stick nga medyu sangka clay!
Matapos magkahit it video, maabu nga nag testing nga eksperimentuhan ro popsicle it Chicecream.
Sa ibang mga viral video, makita nga gindindihan ro popsicle it lighter.
Owa natunaw ro ice cream maskin nga nag-itom ag nasunog eamang raya nga matsa plastic.
Ginpamalibaran it Chicecream ro mga viral nga videos.
Mabasa sa Weibo post it Chicecream official account ro statement nanda nga indi sigon dapat nga obrahon nga basehan ro kalidad it andang mga produkto ro mga videos nga nagakalhit.
Suno pa kanda nga ro andang produksiyon hay nagasunod sa national safety regulations.
May mga espekulasyon nga ro rason kon ham-an nga owa nagakatunaw ro Chicecream hay bangud nga puno raya it additives ag preservatives.
Bangud sa nasambit nga kontrobersya it Chicecream, maabung Chinese netizens ro mas nagapati nga bukon it porke maeahaeon ro sangka produkto hay de kalidad eon raya.
