Kada mainit ro tiempo, eabi eon kon summer, maabu ro nagahandum nga mag-inom it maeamig nga tubi.
May iba man nga maskin maeamig ukon mainit ro tiempo hay bukon it kumpleto ro adlaw kon indi maka-inom it maeamig ukon may yelong tubi.
Apang nasayuran baea ninyo nga ginpahayag it mga eksperto nga may maeain nga epekto sa eawas ro pirmeng pag-inom it maeamig nga tubi.
Una, raya hay nagapahinay sa digestion ukon pagtunaw sa ginkaon ag nagatuga it constipation bangud nga ro maeamig nga temperatura hay nagapa-gutok sa blood vessel ag kon indi matunaw it mayad ro pagkaon, indi eon ma-absorb it mayad it atong eawas ro sustansya kara.
Ikaywa, ginapahinay kara ro pitik it tagipusuon bangud nga ro maeamig nga temperatura hay nagapanaba it heart rate, bangud nga ro vagus nerve sa likod it leog hay naaapektuhan sa gulping pagtueon.
Ikatlo, nagapadugang raya sa timbang bangud nga nagapatig-a it tambok sa eawas ro maeamig nga temperatura.
Ika-ap-at, nagatuga raya it irritation sa tutunlan ag sangka klase it pagsakit it ueo.
