KALIBO, Aklan—Kapin sa tatlong adlaw pa eamang nakatueog it matawhay ro pilang overseas Filipino workers sa Tel Aviv, Israel halin kat nag-eontad ro gyera sa tunga nanda it Hamas militants.
Suno kay Bombo International Correspondent Philip Delos Santos Caragos, maeaka eon lang ro missile rocket nga nagatugpa sa andang syudad kon sa siin insigida man raya nga nasagang it iron dome system it nasyon.
Apang, sa may bahin it southern ag northern Israel hay sigidas gihapon ro opensiba it Israeli defense forces sa handom nga mapulbos ro mga militanteng Hamas nga nagpasimuno sa kinagamo kon sa siin linibong katawo eon ro mga namatay ag ninahan.
Maskin nga maeaka eon lang ro mga nababatian nanda nga eopok hay uwa gihapon sanda nagakumpyansa ag insigidang nagapanago sa bomb shelter agud nga maeowas ro andang kaugalingon kon makabati it mga sirena.
Sa makaron suno kana hay medyo mahipos eon sa andang syudad apang ro mga kaeapit it Tel Aviv hay ginaatake gihapon it mga Hamas militants.
Ginpasiguro man sigon kanda it gobyerno nga pabagsakon nanda ro mga militanteng Hamas nga nagtuga it kinagamo sa nasyon.
