Ginkasubo ni Aklan second district board member Jay Tejada ro nadangatan it mga Aklanon kasunod it grabeng pagbaha nga natabo ko nagtaliwan nga dominggo.
Suno kana, raya eon ro epekto it climate change nga reyalidad nga natabo kon siin uwa eon napunggan it mga kakahuyan sa kabukiran ro tubi nga daea it sigidas nga pag-inuean rason nga nagresulta it maeapnagon nga pagbaha.
Angot kara, may short term response ro gobyerno pinaagi sa paggamit it mandatory disaster fund nga 5% ukon katumbas it P86,095,536 pesos ag 70% nga katumbas it P60,266,875.21 pesos.
Ginpahayag dugang ni Tejada nga raya ro andang ginapahauman nga pondo para sa dag-on 2023.
Dapat suno kana nga ro nasambit nga kantidad hay magamit it husto pag-abot sa disaster response ag infrastructure.
Aminado si Tejada nga maskin anong kamahae it imprastraktura nga proyekto it gobyerno kon ro mother nature eon ro maghueag hay posibleng inde mapunggan bangud sa kakueangan it mga punong kahoy sa kabukiran tuga it illegal logging.
Bangud kara, hugot nanda nga ginaduso ro reforestration partikular sa banwa it Libacao, Ibajay ag iba pang nabukid nga banwa para makabulig nga malikawan ro grabeng pagbaha eabi eon sa mga manaba nga lugar.
