KALIBO, Aklan — Maka-eksperyensiya it maeapnagong power interruption umpisa sa madason nga dominggo ro bug-os nga isla it Boracay bangud sa pole relocation ukon pagsaylu it mga poste it Aklan Electric Cooperative (Akelco).
Nasayuran nga indi pa makapag-full blast ro Department of Public Works and Highways (DPWH) sa andang road widening project bilang kaparte it gina patigayung rehabilitasyon sa isla bangud sa mga naka-balandrang poste.
Sa interview it Bombo Radyo, gin pahayag ni Akelco Area Engineer Jeffrey Inson nga posibling abuton it sang adlaw ro black-out nga paga himuong “section by section” sa bug-os nga isla bangud sa iga patigayun nga pagkay-ad it mga kawad it linya it kuryente ag pag-relocate it mga poste nga naga abot sa 141 nga imaw ro gina turong dahilan it pagka-delay it proyekto it DPWH.
May kaangtanan kara, gin pahayag ni Engr. Inson nga nakipag-angot eon sanda sa iba pang mga electric cooperatives sa nasyun agud magbulig sa pagsaylu it mga nasambitang poste.
Ro pondo sigon maghalin sa DPWH hay naga balor it P96-million.
Nagpangayu man it pasaylu si Inson sa perwisyong iga tuga kara sa mga miyembro-konsumidor.
