KALIBO, Aklan—‘True love knows no reason, no boundaries, no distance’.
Raya ro ginpamatud-an it mag-asawang sanday Mary Lou Bautista Borra ag Ronald Alvisor Borra it Barangay Cabugao, Batan.
Sa interbyu it Bombo Radyo, ginsaysay ni Bombo International Correspondent Mary Lou Bautista Borra ag presensentg nagatrabaho bilang Overseas Filipino Worker ukon OFW sa Hong Kong kung paalin nanda it anang asawa napabilin ro pagpalangga-anan sa kada isaea apisar nga milya-milya ro andang distansiya.
Ro mag-asawa hay kapin eun sa 22 anyos nga kasae ag makarun hay una sa idaeum it ginatawag nga long distance relationship ukon LDR status.//
Si Mary Lou hay nagatrabaho sa Hong Kong samtang ro anang asawa ro nabilin sa Aklan agud nga magbantay sa andang mga unga.
Una nga nagkita ro daywa kat nagatrabaho pa si Mary Lou sa Metro Manila kun sa siin na love at first sight sigon sanda sa kada isaea hasta nga ko ulihi hay naging magkarelasyon ag nagdesisyon nga magpakasae.
Naging madali eamang sigon ro andang relasyon apisar nga Mary Lou hay may unga eun sa anang unang naging karelasyon bangud man sa mahaba nga pag-intindi ag owa it katupong nga pagpalangga kana it anang Mister.
Ko ulihi hay ginpakamayad it asawa ni Mary Lou nga ipadaea ro anang apelyido sa nasambitan nga unga ag gintratar man raya kapareho it anang kaugalingon nga unga.
Matapos nga maikasae ro daywa hay nakaangkon man sanda it andang kagalingon nga unga.
Bangud man sa kagustuhan nga maitao ro maayos nga pagpangabuhi sa anang pamilya, uman nga nagbalik si Mary Lou sa abroad.
Apang maskin nga maeayo sa anang mga mahae sa kabuhi hay ginasiguro sigon nana nga may oras sa gihapon imaw para kanda.
Pag-eaygay pa kara sa mga magkarelasyon nga perming himuon nga sentro ro Diyos sa relasyon agud nga maeampasan ro naga-abot nga problema.
Magtao it oras sa kada isaea ag taw-an it importansiya ro mga importanteng adlaw kapareho it birthday, anniversary ag ro ginabantayan it mga lover’s, rong Valentine’s Day.
