KALIBO, Aklan–Una sa kritikal nga kundisyon ro sangka ama samtang confine man ro anang 9-anyos nga unga sa Aklan Provincial Hospital matapos nga maeakot sa karambola it mga saeakyan sa national highway nga sakop it Brgy. Dumga, Makato.
Ro biktima nga nagapabilin sa ICU hay nakilaea kay Joel Cawaling, driver it tricycle ag residente it Tina, Makato.
Samtang ro anang unga hay padayun nga gina-obserbahan bangud sa mabahoe nga bukoe sa anang dahi.
Base sa report, samtang nagabiyahe ro mag-ama sakay it andang tricycle, ginasugid nga nag-overtake ro sangka pick-up sa kasunod nga kotse paagto sa direksyon it kalibo, apang ulihi eon napan-uhan it driver ro nagapatabok nga tricycle rason nga bumunggo.
Ginasugid nga bangud sa impact, makapilang beses nga bumalintong ro tricycle hasta nga bumunggo pa gid raya sa sambilog pang pick-up.
Samtang, gin-insister it driver it pick up nga si jose pechangco III it probinsiya it antique nga bangud sa pagiging iresponsable it tricycle driver rason nga natabu ro aksidente.
Paagto kunta imaw sa siyudad it Iloilo agud nga magtambong it meeting.
Sa pihak nga parte, ginpahayag ni Mark Cawaling, igmanghud it biktimag si Joel nga engkaso nga indi magkaeasugot ro magtimbang nga parte hay haum sanda nga magpasaka it kontra demand sa driver it pick up nga si Pechangco.
Raya hay matapos nga nagpamalibad raya nga makipag-settle ag nagpaandam pa nga magapasaka it nagakaigo nga kaso bangud sa pagiging irresponsible driver it biktima.
Apang nakadepende pa raya sa resulta it imbestigasyon it makato PNP.
