KALIBO, Aklan—Maabo ro mga trabaho nga gin’agyan nanday King Ralph Villorente ag Lenex Vidal para masuportahan ro andang pagtuon halin high school hasta nga sa makaron sanda hay pasado eun sa Licensure Examination for Teachers.
Pahayag it daywa nga sambilog sanda sa mga maswerteng nakapasa sa pilang libong mga takers it nasambit nga eksaminasyon rason nga eubus gid ro andang kalipay kat makumpirma nga nakabaehag ro andang pangaean sa listahan it mga pasado.
Nasayuran nga mabuhay eun nga mag’amigo ro daywa ag pirme nga magkaibahan sa mga raket ukon gigs.
Dugang pa nanday Villorente ag Vidal nga indi sanda mahimo magpahuway ukon mag’absent sa andang mga trabaho bangud nga kinahang’ean nanda nga makatipon it kwarta pangsustento sa andang pag-eskwela ag sa andang review.
Pabugae man it mag’amigo nga produkto sanda it andang ginhalinan nga eskwelahan halin kat high school pa eamang ro mga raya.
Ginpaathag ni Villorente nga imaw man ro nagapaeskwela sa anang kaugalingon ag nagatao man it kumporme sa anang mga ginikanan para makabulig sa andang pamilya.
Samtang, si Vidal hay nangin inspirasyon ro anang ama nga nagtaliwan eun sa pihak nga kinabuhi kun siin nga para kana importante sigon nga halin sa legal ro anang ginagamit pangbuhi sa anang pamilya.
Sobra pa sigon sa magmanghod ro andang pagkabig sa kada isaea nga nagabueoligan sa mga tyempo nga mabudlay ag nagakinahang’ean it bulig ro kada isaea.
Padumdom it daywa sa kapareho nandang pamatan-on nga palanggaon ro mga ginikanan bangud nga sanda ro unang tagasuporta kanda.
Nagapati sanda nga bukon it hangkat ukon rason ro kakueangan sa pinansiyal bangud nga una ro Ginoo nga nagatao sa tanan naton nga kinahang-eanon.
Gin-insister it daywa nga ro andang kadaeag’an hay halin sa Diyos ag para man sa Diyos.
Eubos man ro pasaeamat it mga raya sa tanan nga nagbulig kanda maghalin sa andang mga himata, review centers, eskwelahan ag mga restaurants ukon resto bar nga ginatukaran.
