POLICE Report — Arestado ro mag-asawang gina-alegar nga parehong adik sa ilegal nga droga matapos nanda nga ibaligya it P100,000 ro bag-ong tawo nanda nga unga sa nurse nga asawa it sangka opisyal it militar sa Cebu City.
Suno sa Cebu City Police Office, sa nasambit nga kantidad, P30,000 ro naagto sa mag-asawang adik, P57,000 sa middleman ukon nag-ahente sa eapsag ag ro nabilin nga kantidad hay gingamit nga pangbayad sa hospital bill.
Nataw ro eapsag ko Pebrero 20 sa Cebu City Medical Center (CCMC) ag nagpabilin sa ospital ro mag-ina hasta ko Marso 6 bangud sa pag-angkon it komplikasyon it eapsag.
Gin-aresto ro mag-asawa samtang nagahampang it tong-its sa guwa it andang baeay sa Barangay Duljo-Fatima ko Marso 7.
Antes kara hay ginsaysay sigon it sambilog sa mga unga nga babaye it mag-asawa sa andang kaeapitbaeay nga nagpromisa kana ro anang mga ginikanan nga pagabak-ean imaw it bag-ong cellphone pagkatapos nga mabaligya ro andang kamanghuran nga igmanghud.
Nakibot ro mga kaeapitbaeay sa andang nasayuran rason nga nagsugid sanda sa mga opisyal it barangay nga insigida man nga nakipag-angot sa Department of Social Welfare and Development (DSWD) para sa nagakaigo nga aksyon.
Sa follow-up operation, naeowas it mga pulis ro eapsag halin sa nagbakae kara sa Barangay Guadalupe, Cebu City.
Nagtuhaw sa inisyal nga imbestigasyon nga ginbaligya ro eapsag sa sangka owa ginpangaeanan nga nurse nga kasae sa sangka opisyal it militar.
Nagapati ro kapulisan nga may kaangtanan ro paggamit it ilegal nga droga rason nga ginbaligya it mag-asawa ro andang ika-pitong unga.
Samtang, sa pagdumaea eon it DSWD ro pitong unga it mga suspek nga makaron hay nakakulong eon sa Cebu City Jail.
