KALIBO, Aklan—Nagpaabot it andang reklamo sa Bombo Radyo ro sangka mag-asawa matapos ro alegasyon nga ginbuhinan it andang barangay kagawad ro andang nabatun nga suweldo sa idaeum it programang Tulong Panghanapbuhay sa Ating Disadvantaged/Displaced Workers (TUPAD) nga ginlunsar it Department of Labor and Employment ukon DOLE.
Suno kay Ronald Belinario, residente it Brgy. Lanipga, Tangalan nga bukon eamang it sanda kundi maabong mga residente ro nagareklamo angot sa bukon it makatarungan nga pagbuhin ni Brgy. Kagawad Menchie Batoy sa andang nabatun nga suweldo maghalin sa andang gin-ubrahan.
Nauna kara hay gintanyagan sigon ni Kagawad Batoy si Belinario nga magsueod sa TUPAD program it DOLE.
Apang ko ulihi hay gin-cancel sigon ro anang payroll bangud nga owa raya nagpabakuna kontra sa covid-19 rason nga ro masunod nandang ginpasueod ro asawa ni Belinario nga si Erica Mariano sa sangka kondisyon nga magpasugot raya nga P1,000 eamang ro anang mabatun sa sueod it 10 diyas nga pagtrabaho.
Agud nga indi eun makaangkon it problema, nagpasugot man sigon sanda sa kagustuhan ni Kagawad Batoy.
Pag-abot it releasing hay nakabatun sigon si Erica it kapin sa P3,950 apang pag-abot sa andang barangay hay ginbo-oe eagi ni konsehal Batoy ro kwarta ag gintaw-an it kapin sa P1,500 si Erica agud indi eun magreklamo pa.
Depensa sigon ni Batoy nga pamaskwa kanda ni Cong. Teodorico “Nonong” Haresco ro nasambitan nga kwarta apang ginpaagi eamang sa mga pomoeuyo
Sa pihak nga parte, ginpahayag man ni Erica Mariano, asawa ni Belinario nga antes ro andang pagtrabaho sa TUPAD program it DOLE hay ginkasugot eagi sanda ni kagawad nga P1,000 ro andang mabatun ag raya hay pagatrabahunan eamang nanda sa sueod it daywang adlaw imbes nga 10 diyas.
Ginklaro man kara nga nagpirma imaw it limang kopya it papel ag nagbatun it P3,950 apang insigida nga ginbo-oe kana ni kagawad ro kwarta ag gintaw-an eamang imaw it P1,500 nga nadugangan sigon it P500 maghalin sa andang nakasugtanan nga P1,000.
