Matapos kaslon, maayos nga nag-iba ro sangka mag-asawa sa Amerika sa sueod it 12 anyos.
Ag kat magnabdos ro babaye, gin-trace nanda ro andang natungdan nga “family tree” agud nga makaisip it igapangaean sa andang magiging unga.
Dikara eon nanda natukiban nga mag-igkampod gali sanda nga daywa.
Ginasugid nga parehong bueag ukon nagdiborsiyo sa mga una nanda nga asawa sanday Tage ag Marcella Hill kat magkakilaea sanda.
Ko ulihi, nagpakasae sanday Tage ag Marcella sa huwes sa sangka intimate wedding.
Maayos ag malinong man ro andang pag-iba hasta nga magnabdos si Marcella.
Dikara hay nag-isip ro mag-asawa it igapangaean sa andang magiging unga.
Gin-usisa nanda ro andang family tree agud nga ilibahon kunta ro mga pangaean it andang mga lolo ag lola.
Apang sa andang pag-usisa, nasayuran nanda nga pareho gali ro pangaean it andang mga lolo ag lola.
Matapos kara, gintawagan nanday Tage ag Marcella ro andang natungdan nga mga lolo ag lola ag ginkumpirma it mga raya nga mag-igbata sanda.
Sa mga family reunion dati, nadiskubre nanda nga posibleng nagkrus eon ro andang mga daean kat mga unga pa eamang sanda.
Nagatuhaw nga mag-third cousins sanday Tage ag Marcella.
Owa eagi nanda nasayuran ro angot sa andang pagiging mag-igbata bangud nga owa nakatambong sa andang simpleng kasae ro iba nanda nga mga igbata.
Nagdangop sa mga eksperto ro daywa sa pageaum nga posibleng makaangkon it problema ro andang mga unga.
Sa pihak kara, naging maayos ro kahimtangan it andang panganay nga waeong dag-on eon makaron.
Ko ulihi gindesisyunan it daywa nga ipangaean ro andang unga sa andang lola sa dapa-dapa.
