BALITANG Espesyal — Sangka mag-asawa sa New Jersey sa Amerika ro maswerteng nakabo-oe it perlas sa gin-order nanda nga kabibe sa sangka seafood restaurant!.
Nagakaon it kabibe ro mag-asawang Michael ag Maria Spressler sa The Lobster House sa Cape May, New Jersey kat may maangkit nga matig-a nga bagay ro mister nga si Michael.
Kat gin-eu-ad raya ni Michael, nakibot sanda nga mag-asawa nga raya hay sangka .35 inch nga perlas!
Suki eon ro mag-asawang Spressler sa The Lobster House sa sueod it 34 anyos apang makaron eamang nanda nasayuran nga posible gali nga makasuwerte sanda it perlas.
Maskin ro mga empleyado it restaurant hay indi makapati sa natabu .
Suno sa staff nga si Sarah Stadnicar, 10 dag-on eon imaw nga naga-serve it nagkaeain-eain nga klase it kabibe sa The Lobster House apang makaron eang nana nasaksihan nga may customer nga matsa nagdaog it lotto bangud sa gin-order nga kabibe.
Ginpa-appraise eon it mag-asawa ro perlas ag nasayuran nga libong dolyar ro value kara.
Suno sa mag-asawa, owa sanda it plano nga ibaligya ro perlas ag plano nanda nga ipa-obra raya bilang alahas agud nga obrahon nga remembrance sa masuwerte nanda nga adlaw kat nakit-an nanda raya .
