KALIBO, Aklan—Ginhatud eon sa andang ulihing paeahuwayan ro bangkay it mag-asawang Jornas ag Lucila Cabauatan sa Alaminos Public Cemetery kahapon nga adlaw it Miyerkules, sang adlaw matapos makit-an nga nagaka-agnas nga bangkay ko Martes pasado it alas-10:00 it agahon sa kusina sa sueod it andang baeay sa Barangay Cabayugan, Malinao, Aklan.
Napas-eawan ro andang naga-isaeahanon nga unga nga eaeaki nga maka uli bangud sa ginapatuman nga travel restrictions sa National Capital Region (NCR).
Samtang, base sa nagguwa nga findings it autopsy report it Scene of the Crime Operative (SOCO), nasayuran nga ro biktimang si Lucila, 55 anyos, hay nag angkon it tatlong igo it pagbuno sa tiyan ag tatlo sa ueo, sambilog sa waea ag daywa sa tuo.
Nakita man sa awtopsiya it anang mister nga si Jornas, 65 anyos, nga nag angkon it kahalitan sa waea nga mata ag uyahon nga ginadudahan nga ginbunae it matig-a nga bagay nga naging rason it anang pagkamatay.
Nakitaan man raya it madaeum nga igo it pagbuno sa idaeum nga parte it anang dueunggan.
Owa nakita sa crime scene ro gingamit nga siyaw nga posibleng gingamit sa krimen.
Base pa sa ginpatigayon nga imbestigasyon, nakahapa sa kusina ro eaeaki samtang nakakaya man ag owa it suksok nga pang-ubos nga eambong ro anang misis.
Narekober man sa kusina it mga awtoridad ro short pants ag underwear it babaye.
Tanan sigon nga mga gamit sa sueod it andang mga aparador hay ginhaeughog ag nakakalhit.
Pagpanakaw ro sambilog sa mga ginatan-aw nga anggulo it mga awtoridad samtang padayun pa nga ginatumod ro mga suspek sa krimen.
