KALIBO, Aklan—Owa nagkaayos ro mag-asawang Jerryl ag Eunice Olog matapos ro andang pagkita ko adlaw it dominggo, Disyembre 5.
Suno sa 37-anyos nga misis nga naging magulo ro andang uman nga pagkita it anang asawa sa andang panimaeay sa Linabuan Norte.
Ginapahayag nga kat nag-uli imaw sa baeay it anang asawa hay naabtan nana rayang naga-inom kaibahan ro anang barkada.
Kat nahilong eun hay naggabot sigon it sanduko ro anang ister nga maswerte man nga anang naagaw rason nga owa it may nasakitan kanda.
Nagwala pa sigon sa guwa it andang panimaeay si Jerryl ag ginpang-eabo ro mga kahoy.
Bangud kara hay napilitan sanda it anang mga unga nga magpaeagiw paadto sa eanas ag nagtawag it bulig sa barangay ag gilayon man nga ginrespondehan it ap-at ka mga Barangay tanod.
Bangud sa hitabo hay temporaryong ginkulong ro anang asawa agud maumpawan sa anang kahilungon apang ginpahilway man pagka- agahon.
Sa makarun hay owa eun nasapwan ro presensiya it anang asawa sa anang gina-istaran nga baeay ag gunasugid nga nag-uli eun raya sa banwa it libacao.
Samtang sa punto man it misis hay ana eamang nga gustong magtao it suporta ro anang asawa para sa andang mga unga ag uman karang gin-insister nga owa eun imaw naila nga makipagbalikan pa kara.
Madumduman nga nauna eun nga nagreklamo sa bombo radyo si eunice matapos nga makapilang beses karang nadakpan nga nagabaeayluhan it “i love you” ro anang mister ag ro anang 55-anyos nga kabit nga si alyas Nenette sa cellphone.
Samtang sa pihak nga parte, ginpahayag man it sambilog sa mga unga it mag-asawang Jerryl ag Eunice Olog nga owa kanda nakatao it sustento ro andang ama.
Kung amat eamang sigon hay ginataw-an sanda it andang ama nga si Jerryl it kwarta nga maigo eang nga ibakae it tinapay.
