Hugot nga nagpanindugan si Kalibo sangguniang bayan member Ronald Marte nga bukon eamang it concern sa ekonomiya it banwa it Kalibo ro apektado sa pagbaton it international flight sa Godofredo P. Ramos airport sa Caticlan, Malay kundi apektado man kara ro ibang kabanwahanan sa eastern side it probinsya it Aklan.
Una kara, nagapanguna imaw sa pagkriar it resolusyon sa sangguniang bayan agud nga kondinahon ag pamaeabagan ro tikang it pribadong kumpanya nga San Miguel Corporation nga imaw ro nagadumaea sa nasambit nga paeoparan nga pahugpaan raya it international flight.
Apang, nauyang ro andang resolusyon pati eon ana it sangguniang panlalawigan pinaagi man sa naging hinyo ni Aklan governor Joen Miraflores bangud nga nadayon gihapon ro kauna-unahang flight it Royal Air, sakay ro masobra sa 200 ka mga pasahero maghalin sa Tapei, Taiwan nga naghugpa bandang alas-4:45 it hapon ko Disyembre 26.
Ginpahayag dugang ni Marte nga bukon eamang it sa ekonomiya ro andang concern kundi maging sa kaeowasan it mga pasahero bangud nga bukon it standard para sa international nga byahe ro paeoparan.
Gusto eamang sigon it natungdan nga negosyante nga mag-umwad pa gid ro andang negosyo ag mabawi ro andang investment apang risgo raya sa mga sumaeakay ag mga turistang magapadueong sa isla it Boracay.
