Parehong confined sa provincial hospital ro mag-igkampod matapos nga magbueon-an kainang alas-1:35 it aga-aga sa may bahin it Brgy. Carugdog, Lezo.
Ginkilaea ro biktima kay Julius Masula, 30-anyos ag ro suspek nga si Wilfredo Masula, 39-anyos ag parehong residente it nasambit nga lugar.
Sandig sa inisyal nga imbestigasyon it Lezo Municipal Police Station, natabo ro insidente sa sangka namatyan sa nasambit nga lugar matapos nga mag-inoman ro mga raya.
Ginapahayag nga naki-intra ro suspek sa grupo it biktima para makipag-inoman.
Samtang naga-inoman sigon ro mga raya hay padayon nga nagasinaligbat ro suspek sa pag ue-istorya it biktima ag ibang kainoman kara sa pihak nga owa man raya nakasayod sa topiko.
Rason nga ginsita it biktima ro suspek kung siin nakaangkon it mainit nga argumento sa tunga it magtimbang nga parte.
Gintikeod sigon ni Wilfredo si Julius ag insigidang ginbuno sa may pueanan nga porsyon it anang kaeawasan it kapin sa daywang beses.
Sa pihak it naangkong daywang tama it pagbuno hay natakuran pa ni Julius nga makabangon ag insigidang gin-eagas si Wilfredo ag ginbuno man sa pueanan nga porsyon it anang kaeawasan.
Insigang ginrespondehan it mga otoridad ro nasambit nga insidente ag parehong gindaea sa ospital ro daywa.
Sa makaron, padayon pa ro ginapatigayon nga imbestigasyon it Lezo-PNP angot sa insidente.
