KALIBO, Aklan—Padayun nga gina-obserbahan sa intensive care unit ukon ICU it Aklan provincial hospital ro mag-asawa matapos nga pangbun-on ro mga raya it andang unga nga babaye nga gina-alegar nga may sakit sa paminsaron bandang ala-1:30 kaina it aga-aga sa Barangay Cawayan sa banwa it New Washington.
Ro mag-live-in partner nga sanday Olivia Guttierez, sangka mananahi ag Ronald Conde, tricycle driver, parehong tubong Mindoro ag presenteng naga-istar sa nasambit nga lugar hay nag-angkon it igo it pagbuno sa nagkaeain-eain nga parte it eawas.
Boluntaryo man nga nagsurender ro suspek nga si Vangie Babet, sa legal nga edad, ag bueag sa asawa sa mga rumespondeng pulis.
Base sa report, natabu ro insidente samtang hamuok nga nagakatueog ro mag-asawa sa magkaseparadong eugban sa sueod it andang baeay.
Basta eon lang sigon nga ginpangbuno it suspek ro anang ina nga kaiping kara sa pagtueog ag pagkatapos hay ginbuno man ro anang stepfather nga nagakatueog sa guwa it andang kwarto.
Matapos ro pagpang buno hay nakapangayo pa it bulig ro mag-asawa sa andang mga kaeapitbaeay nga insigidang gindaea sa nasambit nga ospital it mga rumespondeng miyembro it MDRRMO.
Sa mayad nga swerte sigon ag utod ro punta it kutsilyo nga gingamit sa krimen nga ginturn-over it suspek sa mga pulis.
Nasayuran nga dati eon sigon nga ginpabueong sa sangka mental hospital ro suspek.
Sa makaron hay nagapadayun ro imbestigasyon it kapulisan sa nasambit nga insidente.
