KALIBO, Aklan—Nag-umpisa eon makaron nga adlaw ro foodfest bilang kaparte it nakataeanang opening salvo it Kalibo Sto. Niño Ati-Atihan festival 2023 sa Sabado, Oktubre 8.
Suno kay Mary Gay Quimpo-Joel, head it Municipal Economic Enterprise Development Office ukon MEEDO-Kalibo nga ro pormal nga pagbukas it food festival nga gintukod sa kilid it covered court sa Kalibo pastrana park hay ginatawag nga disperas de salvo.
Ro food fest hay magabuhay hasta sa domingo, Oktubre 9.
Kapin sa 27 nga mga concessionaires ro nagpasakop nga kaabuan hay mga tag-ana it restaurants ag magabaligya it andang mga ginapabugae nga putahe.
Kaeabanan sa mga raya hay naga angkon it mayors permit nga may negosyo sa banwa it Kalibo.
Samtang, may mga nakalinyada sigon nga serye it mga aktibidadis hasta sa adlaw it sabado.
Pagkatapos it state of the municipal address ni mayor Juris Sucro hay makaangkon it opening of lights nga pagasundan it sadsad ukon merry making ag foam party hasta alas-12 it tungang gabi-i.
Samtang, haum eon man sigon ro security deployment plan sa event kun sa siin mag eowas sa mga pulis hay may magabantay man nga mga tanod.
Gin-abisuhan man nana ro publiko nga maskin may paghaeuga eon ro mga restrictions hay sundon sa gihapon ro minimum health protocol.
