KALIBO, Aklan–Ginpadumdum it Commission on Elections ukon Comelec Aklan nga sa maabot nga Setyembre 1, 2020 hay magapadayun ro voter registration sa mga lugar nga sa idaeum it general community quarantine ukon GCQ ag MGCQ kapareho it probinsiya it Aklan.
Suno kay Atty. Rommel Benliro, municipal election officer it banwa it Kalibo ag Comelec Aklan spokesman nga pwedeng magsumite it aplikasyon para sa registration kada Martes hasta Sabado sa Office of the Election Officer umpisa alas 8:00 it agahon hasta alas 3:00 it hapon.
Gin engganyo man nana ro mga magaparehistro nga i-download ro application forms sa www.comelec.gov.ph.
Ginpahayag pa ni Atty. Benliro nga magapatuman it anti-COVID precautions sa kada taeatapan Comelec.
Kaibahan kara ro paglimita sa numero it mga magasueod nga aplikante sa sueod it opisina it Comelec agud nga masiguro nga masunod ro physical distancing.
Indi man pagapasudlon ro mga aplikante nga owa it suksok nga face mask ag face shield kamana man nga gina engganyo ro tanan nga magdaea it kaugalingon nga ballpen.
Samtang, maga agi man sa express lane ro mga senior citizen, person with disabilities ag mga nabdos.
