KALIBO, Aklan—Magapangatubang it kasong criminal ag civil liability ro sangka indibidwal nga nagabastos sa mga Persons with disabilities ukon PWD’s.
Suno kay Randy Anthony Rebaldo, sangka Persons with disability Affair Officer sa probinsya it Aklan nga ro sin-o man nga nagatuya-tuya sa mga PWD pamaagi sa verbal ukon nonverbal hay pwedeng mapasakaan it kaso.
Engkaso nga ginbastos ro mga raya ag may daywa ukon masobra pang nakasaksi sa hitabo, pwede sigon nga magpangayo it bulig sa andang taeatapan para mabuligan sa pag-proseso it mga papeles.
Raya hay sandig man sa RA 9442 – An Act Amending Republic Act No. 7277, ukon mas kilaea sa tawag nga “Magna Carta For Disabled Persons, And For Other Purposes”.
Samtang, gin-engganyo man kara ro mga Barangay kapitan sa probinsya nga buligan ro andang mga pomoeuyo nga PWD agud maka-avail it benipisyo maghalin sa gobyerno.
Sa barangay pa eamang sigon hay may naka-alokar eun nga .05 percent para sa programa para sa mga PWD’s.
Maging mas manami pa gid sigon kung magtindog it kaugalingon nga PWD “help desk” ro tanan nga barangay para matutukan ag mataw-an it nagakaigo nga bulig ro mga PWD’s sa andang tagsa ka mga lugar.
Samtang ginpasaeamatan man it sangka Persons with disability Affair Officer nga si Randy Anthony Rebaldo ro sambilog sa mga myembro it Sangguniang Pnalalawigan ukon (SP-Aklan) nga si SP Member Jay Tejada.
Bilang sangka myembro ag head it advisory board it PWD, mabahoe suno kana ro naibulig ni SP Tejada para mas pang mapabaskog ro andang kinamatarong.
