KALIBO, Aklan—Magbueuligan ag mag-ueunungan sa tunga it pandemya agud nga maeampasan ro krisis nga ginapangatubang daea it coronavirus disease 2019 ukon Covid 19.
Raya ro naging panawagan ni Aklan Governor Florencio Miraflores sa publiko.
Ro komento hay kasunod it uman nga pagsanib-pwersa nanda ni Aklan 1st district congressman Carlito Marquez.
Tuyo sigon it andang ginbilog nga united leadership kaibahan si Aklan 2nd district congressman Ted Haresco nga madali nga makabangon sa epekto it pandemya.
Kinahangean suno kana nga ipaiway anay ro pulitika.
Aminado ro gobernador nga imposibli pa nga makabangon ro ekonomiya it Aklan hasta sa 2021 bangud sa bagsak nga industriya it turismo, kun sa siin maabu ro naduea-an it trabaho.
Maskin sigon nga nag-ober-da-bakod sa ibang partido si Marquez ko nagtaliwan nga mga eleksyon hay nagapabilin ro andang respeto sa kada isaea.
Samtang, no comment man imaw sa napabalitang ro anang unga nga si Ibajay mayor Joen Miraflores ro magabueos sa anang pwesto.
Suno kana nga maeayo pa ro eleksyon ag owa pa nanda raya gina istoryahan.
