Mayad nga balita nga owa eon masyadong nagataas ro kaso it COVID sa nasyon.
Apang ro maeain nga balita, ro dengue man makaron ro nagataas ro numero ag may mga namatay eon.
Kaabuan sigon sa mga nagka-dengue hay mga unga.
Makaron nga gindeklara eon it Philippine Atmospheric, Geophysical and Astronomical Services Administration (PAGASA) ro tag-uean, siguradong maabu pang mga sakit nga may kaangtanan kara ag sambilog kara ro dengue.
Kon naga inuean, siguradong makaangkon it tubi ro mga basiwo it softdrink, lata, ka-ang ag iba pang bueutangan.
Ro mga raya ro breeding grounds it namok.
Dikara naga itlog ro mga namok nga ginatawag nga Aedes Aegypti.
Kaeabanan man raya nga makita sa mga madueum nga parte it baeay ag ro mga nakasab-it nga eambong.
Sa report it Department of Health (DOH), may pagtaas it dengue cases sa Western Visayas.
Suno sa DOH, may nailista eon nga 1,034 nga kaso it dengue sa nasambit nga lugar umpisa Enero 1 hasta Mayo 7 it makaron nga dag-on.
Suno pa sa DOH, 18 eon ro namatay.
Ro kaso it dengue makaron hay 36 percent nga mas mataas kaysa ko nagtaliwan nga dag-on.
Mas delikado ro dengue kaysa sa COVID.
Ro COVID hay may bakunang pangsukoe bukon it kapareho it dengue nga owa bangud nga nakaangkon it kontrobersiya sa Dengvaxia ko 2016.
Sa pag abu it kaso it dengue, ro pag-dahan ag paglimpyo sa palibot ag sa sueod it baeay ro nagakadapat agud nga makalikaw kara.
Kun owa it paga-itlugan ro mga namok, owa man it dengue.
Pabaskugon pa it DOH ro pagtau it impormasyon sa pumueuyu angot sa dengue.
Bukon eamang sa COVID-19 dapat mag-dahan kundi pati sa dengue nga makamaeatay
