Nagahilapit eon man ro mahaba nga bakasyon.
Maga-umpisa eon man ro pag-uli it maabu nga mga pumueuyu sa andang natungdan nga mga probinsiya.
Ro iba hay pagapanipuslan ro mahabang break agud nga makapamasyar kaibahan ro pamilya.
Makaron pa eamang hay nagapadumdum ro Philippine National Police sa pagdahan it publiko.
Likawan nga mag-post it andang mga aktibidad sa social media.
Tandaan ninyo nga nakamonitor ro mga kawatan, nakabantay eang ag naga-usoy it andang target.
Kaeabanan nga kon Holy Week hay naga-bonding ro mga pamilya.
Kaeabanan nga gina-aywan nga owa it tawo ukon bantay ro andang baeay.
Suno sa PNP, updated man sa mga makabag-ong teknolohiya ro mga kawatan ag mga kriminal.
Nakamonitor sanda sa mga aktibidades it mga pamilyang andang pagabiktimahon.
Kun indi magiging madahan, basi nga mauyang ro bakasyon ag pag-uli hay kaakig ro mabatyagan bangud nga naubos it mga kawatan ro gin-aywan nga baeay.
Laygay it PNP, indi anay mag-post it inyong mga aktibidad sa social media partikular sa ‘in real time’ agud nga indi mataw-an it impormasyon ro kawatan nga owa it tawo sa inyong baeay.
Eabi pa ag medyu nagtaas makaron ro kaso it theft ag robbery partikular sa Metro Manila umpisa ko Enero.
Aminado man ro PNP nga kaeabanan nga nagakatabu ro mga kaso sa mga lugar nga manaba ro police visility.
Kabay nga pabaskugon man it kapulisan ro andang pagpatrolya eabi eon sa masunod nga domingo kun sa siin maabu ro magabakasyon.
Kun maabu nga mga makitang nagapatrolya sa andang natungdan nga mga nasakupan, posibleng magduha-duha nga umatake ro mga kawatan.
