KALIBO, Aklan — Presenteng sa isla it Boracay si Presidential Spokesperson Harry Roque sa nakataeanang pag-anunsyo kara sa action plan para sa isla.
Suno kay Executive Assistant to the Mayor Rowen Aguirre, naga eaum sanda nga paga bawion ni Pangueong Rodrigo Duterte ro paeag nga ipaidaeum sa state of calamity ag ipasara ro Boracay bangud sa gina himo sigon it LGU-Malay ro tanan agud mapadasig ro rehabilitasyon ag maibalik sa dating kanami ro isla.
Naga padayun sigon ro gina himong clearing operations sa mga ilegal nga istraktura maeapit sa baybayon, sidewalks ag roads right of way kamana man ro pagbukas sa mga drainage canal.
Naga kalipay sigon sanda sa naging resulta kara bangud sa mabahoe nga pagbag-o sa bug-os nga isla sa bulig it mga stall owners ag mga naga panag iya it hotels ag resort sa gina himong voluntary demolition.
Gin pahayag dugang pa ni Aguirre nga insigida eon nga gin pasarado ro mga establisimentong nakitaan it magkaeain-eain nga illegal pipe connections.
Kaparte sigon raya it six-month action plan agud masolusyunan ro environmental problems sa Boracay kasunod sa mandu ni Pangueong Duterte nga limpiyuhan ro isla sa sueod it an-um nga buean.
Madumduman nga nagpaandam ro Pangueo nga maga pangatubang sa kaso ro mga opisyal ag stakeholders nga indi maga kooperar sa national government sa pagkay-ad sa Boracay.
Maga pueong makaron nga adlaw ro inter-agency task force nga gina eakipan it Department of Tourism, Department of Environment and Natural Resources ag Department of Interior and Local Government kun siin iga sapubliko ro mga planong iga patigayun para sa Boracay.
