Ginlaygayan makaron it Department of Trade and Industry ukon DTI-Region 6 ro publiko nga maging madahan sa pagbakae it mga paeupok makaron nga holiday season.
Suno sa ahensiya nga dapat nga maging mapag-usisa sa labels it produkto kapareho it brand name, manufacturer’s name ag address, ag ro Philippine Standard ukon PS Mark nga nagapakita nga eowas ag may kalidad ro paeupok.
Gin abisuhan pa it DTI ro publiko nga magbakae it mga paeupok nga may tatak nga “Made in the Philippines” bangud nga hugut nga ginabawae ro pag-import kara.
Gina engganyo man ro tanan nga tan-awon it mayad ro warnings ag instructions sa paggamit agud nga malikawan ro mga aksidente.
Samtang, ginkumpirma it DTI nga owa it lisensiyadong firecracker manufacturers sa Western Visayas kun sa siin kaeabanan sa mga raya hay halin sa Bulacan.
Nasayuran nga kaibahan ro DTI sa mga naga monitor sa mga baealigyaan it paeupok sa mga gindesignate nga lugar sa kada banwa.
Ro madakpan nga nagabaligya it firecrackers halin sa bukon it lisensiyadong manufacturers ukon brands hay magapanabat sa laye ag pagakumpiskahon ro andang baligya.
Sa pihak nga parte, ginpadumdum man it Philippine National Police (PNP)-Civil Security Group ro mga pumueuyu nga magbakae eamang it Philippine Standard-certified fireworks and firecrackers halin sa registered retailers and dealers.
Nag apela man ro mga awtoridad nga insigidang ireport kon may mataeupangdan nga nagabaligya it illegal nga paeupok agud nga makasiguro it eowas ag accident-free nga selebrasyon .
