KALIBO, Aklan — Daywa ro patay samtang nakaeowas ro sambilog pa sa sangka aksidente sa motorsiklo sa Barangay Naile, Ibajay, Aklan.
Namatay ro magkaklaseng sanday Wencies Evangelio, 17, residente it Barangay Malindog, Ibajay ag John Eric Magsael, 19, it Barangay Monlaque sa nasambitan man nga banwa, parehong Grade 12 student matapos sumunggab ro andang ginasakyang motorsiklo sa puno it mahogany.
Nakaeowas man ro driver it motorsiklo nga si Bryan Joseph Belinario, 19, it Barangay San Jose, Ibajay.
Suno kay PO1 George Regalado it Ibajay Police Station, ginabaybay it tatlo ro provincial road pauli sa baeay ni Belinario kat mawad-an it kontrol sa pagpamaneho sa madasig nga pagpadaeagan kara.
Nakaangkon it fatal nga lastro sa ueo ag nagkaeain-eain nga parte it eawas ro mga biktima.
Gindaea sanda sa Ibajay District Hospital apang gindeklarang dead on arrival ro daywa.
Samtang, gilayon man nga nakaguwa it ospital ro driver nga si Belinario nga una sa kustodiya makaron it pulisya.
Aminado raya nga halin sa inuman kat matabo ro aksidente.
