Ginpatigayun ro wedding ceremony ni Kirt Lester Ebrada, alyas “Amihan” ag John Rey Lasap sa sangka function hall sa banwa it Daraga, Albay ko nagtaliwan nga adlaw it Sabado, Agosto 6.
Ginpangunahan ro seremonya it protestant pastor nga si Rev. Fr. Macario Sangcap it LGBT Christian Church nga nagbiyahe pa paadto it Albay halin sa Manila.
Kapareho it tradisyunal nga kasae sa simbahan, nakasuksok it puting wedding gown si Amihan samtang si John hay nakaporma it modern barong kamana man nga kompleto ro andang entourage.
Waeong buean nga naging magkarelasyon ro daywa antes nagdesisyon nga magpakasae.
Make-up artist si Amihan halin sa banwa it Daraga, Albay ag senior high school teacher si John nga dating seminarista halin Sorsogon City.
Plano sigon nanda nga mag-ampon it daywang unga engkaso nga makaangkon eon it stable job si Amihan nga sangka lisensiyadong manugturo.
Matueopangdan nga owa pa ginakilaea sa nasyon ro same-sex marriage.
