KALIBO, Aklan—Mag-live-in partner nga gina alegar nga nagaduso it iligal nga droga ro natigayon nga maaresto sa ginpatigayon nga buy-bust operation kaina it udtro adlaw sa Brgy. Laguinbanua East sa banwa it Numancia.
Ginkilaea ni P/Lt. Col. Frenzy Andrade, head it Provincial Drug Enforcement Unit ukon PDEU ro mga suspek nga sanday Chrismar Patenio ag live-in partner kara nga si Rosalie Fernando.
Si Chrismar nga ginasugid nga sangka fish vendor ag residente it Brgy. New Buswang, Kalibo, apang temporaryong naga-istar sa nasambit nga lugar.
Ginpahayag dugang nga may boarding house man raya sa Kalibo.
Nakumpiska sa andang posisyon ag kontrol ro 6 nga sachets it ginadudahan nga shabu kamana man ro P6,000 nga buybust money, sangka unit it cellphone, sangka coin purse nga may sueod nga kwarta nga nagabalor it P2,667 ag sambilog pang coin purse nga may sueod nga cash nga P11,756 pesos.
Suno kay Lt. Col. Andrade nga haeos daywang dag-on man ro andang surveillance sa suspek.
Nagapangatubang ro daywa sa pag-eabag sa Comprehensive Dangerous Drugs Act of 2002.
Nakataeana sandang iga transport sa crime laboratory sa siyudad it Iloilo para sa drug test kamana man sa narekober kanda nga shabu.
