KALIBO, Aklan — Ginpamatud-an it maglive-in partner ro andang pagmaeahaean nga hasta sa presuhan hay maga-iba sanda matapos nga pasakaan it kasong may kaangtanan sa R.A 9165 ukon Comprehensive Dangerous Drugs Act of 2002 kasunod it ginkasa nga anti-illegal drug buy bust operation sa Purok 6, Brgy. Tigayon, Kalibo.
Nakilaea ro mga suspek nga sanday Ron Michael Villanueva, 26 anyos ag Ella Melgarejo, 25 anyos, parehong naga-istar sa nasambit nga lugar.
Ro mag-live-in partner hay nadakpan it mga awtoridad, agahon it Huwebes, Pebrero 13, bisperas it Valentine’s day sa sangka waiting shed sa ginpatigayon nga operasyon nga ginpangunahan it Kalibo Municipal Police Station.
Narekober sa andang posisyon ag kontrol ro daywang sachet it ginadudahan nga marijuana, P1,000 nga marked money, drug paraphernalia, cellphone ag iba pang non-drug items.
Temporaryong sa custodial facility it Kalibo MPS ro maglive-in partner bangud sa andang ginapangatubang nga kasong may kaangtanan sa illegal drugs.
Samtang, ginasugid nga mga menor de edad pa eamang hay naga-engage eon ro mga suspek sa pagduso it iligal nga droga partikular ro marijuana ag shabu.
