KALIBO, Aklan—Nakakulong eon ag nagapangatubang sa kasong direct assault ag resistance and disobedience upon an agent of a person in authority ro magmaeanghud matapos nga magsukoe ag manakit sa mga rumespondeng pulis sa natabu nga komosyon sa Sitio Diniwid, Barangay Balabag sa isla it Boracay.
Nakilaea ro mga suspek nga sanday Eddian Manuel, 27; ag Jacob Manuel, 25, parehong residente it nasambit nga lugar.
Base sa report halin sa Malay Police Station, rumesponde ro tropa sa nasambit nga kinagamo ag insigidang nag-imbestiga si Patrolman Alalon, apang sa indi matumod nga kabangdanan hay insigida imaw nga ginsalakay it daywa ag ginbinayo.
Bangud kara, nagpatunga si Police Senior Master Sergeant Larry Molo apang imbes nga magpundo ro magmaeanghud hay ginkabuligan pa nanda nga sakiton ro pulis nga tinamaan sa dughan ag ueo.
Ginhana pa sigon nga bun-on ni Eddian it icepick si Patrolman Alalon apang madasig raya nga nakalikaw.
Napundo eamang sigon ro kinagamo kat mag-abot ro tatlong iba pang mga pulis ag insigidang gin-aresto ro mga suspek ag gindaea sa estasyon it pulisya, kun sa siin presenteng nakakulong para sa nagakaigo nga disposisyon.
