KALIBO, Aklan—Namatay samtang ginabueong sa Aklan Provincial Hospital ro sangka babaye matapos nga mahueog sa istaka ro anang ginasakyang motorsiklo kaibahan ro anang nobyo sa Brgy. Poblacion, Libacao, Aklan.
Base sa report, nakaangkon it fatal nga lastro sa eawas ro biktimang si Lynlyn Sison, 17-anyos, residente it Brgy. Pampango, Libacao, Aklan samtang gasgas sa nagkaeain-eain nga parte it eawas man ro naangkon it anang nobyo nga si Biboy Esto, 25-anyos, tubong Tapaz, Capiz.
Suno kay PO3 Carron Mayor it Libacao Police Station nga base sa andang inisyal nga imbestigasyon, ginatun-an it pagmotor it anang nobyo ro babaye sa ibabaw it istaka kon siin uwa sigon nataeopangdan it mga raya nga uwa pa matapos ro construction.
Bangud kara, dumiretso ro kariton it motorsiklo sa buhang it istaka nga naging kabangdanan man it andang pagkahueog ag nagresulta sa pag-angkon nanda it mga lastro sa eawas.
Ginatantya nga kapin sa 6 feet ro kataason it nasambitang istaka.
Ro daywa hay insigidang gindaea it mga nagrespondeng MDRRMO- Libacao sa rural health center ag matapos nga maeapatan it paunang medikasyon hay gilayon man nga gintransfer iya sa banwa it Kalibo.
Si Sison hay ginsueod sa intensive care unit ukon icu apang uwa eon man natabangan ag ginbawian it hueam nga kinabuhi samtang si Esto hay nagapabilin nga naka-confine sa nasambitang hospital para sa anang nagakaigong pagbueong.
