KALIBO, Aklan—Nagapati si Atty. Harry Sucgang, dating Sangguniang Panlalawigan member ag political analysts sa Aklan nga ro impeachment trial nga nagatuyo nga mapahalin sa pwesto si Vice President Sara Duterte hay mas eaban nga political process kaysa sa legal nga isyu .
Raya hay maskin nga may basehan ro mga reklamo ag sandig sa constitutional requirements.
Suno kay Atty Sucgang nga ro resulta it proseso hay posibleng maimluwensiyahan it political landscape, kun sa siin ro loyalty, party affiliation, ag ro pabag-o bag-o nga nagahari sa pwesto ro magatumod sa magiging pinal nga desisyon.
Madumduman nga base sa verified complaint nga gin-aprubahan sa plenaryo it Kamara, gin-impeach si Duterte base sa mga alegasyon it Culpable Violation of the Constitution, Betrayal of Public Trust, Graft and Corruption, ag Other High Crimes.
Angot kara, laygay ni Atty Sucgang sa mga botante, agud nga malikawan ro mga makarondaya nga proseso sa pagpatalsik sa pwesto sa sangka opisyal hay kinahangean sa mga Pilipino nga magpili it angay ag bagay nga kandidato kada eleksiyon.
Nakabaehag man suno kana sa Konstitusyon ro kahilwayan it kada isaea nga magpili it igaboto rason nga nakadepende katon ro gahum para magpili it igabutang sa pwesto.
Ginpahayag dugang nga may mga Pilipino nga nagaboto eamang bangud nga sikat ro sangka kandidato ag may una man nga nabobo-oe bangud sa “vote buying” ag nagapadikta sa ibang tawo.
