KALIBO, Aklan—Ginkumpirma it Batan Municipal Police Station nga daywa ro patay sa natabo nga insidente it pagkaeumos sa suba pasado alas-10:30 it agahon kahapon sa Sitio Batog, Brgy. Lupit, Batan.
Suno kay Police Corporal Ronnie Turega it Batan Municipal Police Station, ro mga biktima hay ginakaeakipan it magtiya nga sangka 35-anyos nga ina ag napueong dag-on nga ungang eaeaki.
Naghinyu sigon ro pamilya it mga biktima nga indi eon sanda pagpangaeanan.
Maswerte man nga naeuwas it mga residente ro napueong dag-on nga ungang eaeaki it ginang kung siin gilayon raya nga gindaea sa Altavas District Hospital para sa nagakaigo nga pagbueong.
Base sa inisyal nga imbestigasyon it pulisya, samtang ginahugasan it magparyente ro andang ginpamueot nga tuway sa suba hay nagpaligos man ro daywang ka mga unga kung siin makataliwan ro pilang minuto natueopangdan ro pagkaeumos it sambilog rason nga insigida nanda raya nga gin-tabangan.
Ginasugid nga indi haeos kantigo mag-eangoy ro magtiya rason nga owa sanda naka-euwas.
Una sigon nga nakita ro bangkay it napueong dag-on nga ungang aeaki samtang bandang alas-4:30 eon it hapon kat nakita ro eawas it 35-anyos nga tiya kara nga nakasab-it sa lambat.
Gilayon pa nga gindaea sa pinakamaeapit nga ospital ro mga biktima apang gindeklara nga Dead on Arrival.
