Maabu eon ro naga-abang kon madayun ro Barangay ag SK elections sa Disyembre 5, 2022.
Kapin sa 41 nga proposed bill ro gindihon makaron sa Kamara para sa pagpaiway it nasambit nga eleksyon.
Nag-umpisa eon man nga magpabatyag ro mga naga-ambisyon nga makapuwesto.
Sa pihak kara, posible sigon nga indi raya madayun bangud nga kapin sa P8.11 bilyon pesos ro matipid it gobyerno kun raya hay mapaiway.
Ro kantidad nga matipid kara hay pwedeng gamiton sa nagapadayun nga COVID-19 response ag iba pang kinahangeanon nga pang-ayuda.
Ro problema, kun mga owa it pueos ro presenteng opisyal sa barangay, ma-extend man ro kapalpakan ag pag-antus it mga pumueuyu.
Kun puwede eang kunta nga magboluntaryo nga maghalin ro mga owa it ‘K’ sa posisyon agud nga mabayluhan it mga responsable ag tampad.
Kadungan kara, ginahirit man ro pagpaeawig sa termino it Barangay ag SK officials it hasta sa limang dag-on.
Masyado sigon nga matag-od ro tatlong dag-on agud nga mapamatud-an it sangka opisyal ro anang ikasarang nga magdumaea .
Importante ro mga barangay officials.
Sanda ro unang nakasayod it kahimtangan it pumueuyu.
Sanda ro unang ginadaeaganan it mga nagakinahangean.
Ro maayos nga barangay hay paagto sa mas malinong ag maumwad nga nasyon.
Rason nga pili-on naton ro mga nagakadapat nga magarepresentar katon.
