Ginkondena it grupo nga Bagong Alyansang Makabayan (Bayan)-Panay ro madasig nga pag-arangkada it kontrobersiyal nga Maharlika Investment Fund sa Kongreso ag sa paghimu kara nga”priority bill” para maipasa bilang laye.
Suno kay Elmer Forro, secretary general it nasambit nga grupo, imbes nga makabulig ro Maharlika fund hay igabutang eamang sigon kara sa aeang-aeang ro pondo nga para sa pumueuyo nga nagahalin sa ginabayaran nga mga tax ag buwis.
Owa sigon it ibang pagadangatan ro “investment fund” kungdi para maging rason it korapsyon ag anomaliya.
Raya hay bangud sa uman nga pagbalik sa SSS ag GSIS (government insurance system) bilang kapital gamit ro pondo it pension ag housing it mga obrero sa pampubliko ag pribado nga sektor.
Dugang pa suno kana kapin sa P500 B ro pagagamiton nga kapital maghalin sa Landbank, Development Bank of the Philippines, PAGCOR ag iba pang asset nga ro magadumaea hay Malacanang nga bulnerable sa abuso ag korapsyon it gobyerno.
Dapat sigon nga itaeana eon lang it gobyerno ro mga nasambit nga pondo para sa mga pampublikong serbisyo kapareho it pagpataas it budget sa ikamayad nga eawas, edukasyon, pagpabaskog it lokal nga produksyon, ayuda sa mga nadaeasa it kalamidad ukon pagdugang sa sweldo it mga obrero nga mas may pueos kumpara sa pagtutok sa MIF.
Kinahangean man sigon nga tutukan it gobyerno ro padayon nga pagsirit it presyo it mga nagapangunang baeakeon bangud sa inflation
