Nag-positibo sa Coliform ag E-coli bacteria ro suplay it tubi halin sa Metro Kalibo Water District (MKWD) sa banwa it New Washington.
Raya hay base sa ginpaguwa nga test results it Microbiological Analysis nga ginapaguwa it Department of Health (DOH) Western Visayas Center for Health Development nga gin-request it lokal nga gobyerno it nasambit nga banwa.
Suno kay Mayor Shimonette Francisco, bangud sa kabaeaka sa ikamayad nga eawas it anang pumueuyo, gin-insister nanda ro nasambit nga water testing para nga may ipakita sanda sa nagakaigo nga taeatapan.
Paathag nana, sa 20 ka mga specimen mag-halin sa nagkaeain-eain nga barangay sa banwa, 19 kara ro eaban nga nag-positibo sa E-coli ag Coliform bacteria.
Dugang pa it Mayora, sa pihak nga may ginpaathag nga plano ro MKWD kapareho it magsa-ayos it mga pipe lines ag pag-patigayon it chlorine treatment, uwa imaw it habuoe nga klaro nga sabat sa andang gina-punto nga problema.
Nagpadumdom man imaw sa mga pumueuyo nga samtang uwa pa naayos ro problema hay indi anay direkta nga mag-inom it tubi halin sa gripo bangud eon man sa paeag sa ikamayad nga eawas.
