Padayun nga ginareklamo it mga residente sa Barangay Jugas, New Washington ag iba pang lugar sa nasambit nga banwa ro mahinang water pressure ag aberya sa suplay it tubi.
Angot kara, ginpaathag ni Frederick Buenavidez, tagapaghambae it Metro Kalibo Water District nga aminado sanda sa nasambit nga problema bangud sa paghina it supply it tubi halin sa andang water sources sa Barangay Tigayon, Kalibo ag sa Barangay Linabuan Sur, Banga.
Sa nasambit sigon nga mga planta nagahalin ro tubi nga gina supply sa andang mga konsumidor sa banwa.
Nakaangkon suno kana it problema sa water supply sa daywang pumping station sa Brgy. Tigayon ko Disyembre 2023 ag ko Marso 2025 hay naka-eksperyensiya man it water depletion sa andang planta sa Brgy. Linabuan Sur.
Ginpaathag kara nga naghina ro produksyon it tubi sa andang mga planta tuga it pagnaba it ground water source.
Bangud kara, gina engganyo sigon it national government ro mga water service provider sa bilog nga nasyon nga maggamit it surface water ukon tubi halin sa mga suba, dam ag iba pa agud nga masabat ro nagabahoe nga pagkinahangean sa suplay it tubi.
Ginpasiguro man it MKWD nga maabu sanda nga mga proyekto nga pagahimuon agud nga makaangkon it mas maayos nga serbisyo .
Sambilog sa ginpromisa nanda sa LGU New Washington ro maayos nga chlorination ukon pag-disinfect sa andang gina supply nga tubi agud nga makasiguro nga eowas raya nga imnon, ag malikawan ro mga sakit nga tuga it kontaminadong tubi.
