Ginasueong ni Aklan 1st District Rep. Jesus “Papa Jess” Marquez ro mas mahugot nga regulasyon sa online gambling agud maprotektahan ro mga kabataan ag pamilyang Pilipino kontra sa maeain nga epekto pagsugae.
Suno kana, kaibahan sa mga tikang nga gintalakay ro House Resolution No. 102, nga imaw ro nag-author, nga nagatuyo nga magpatigayon it imbestigasyon sa pageapta it online gambling ag epekto kara sa kabataan ag mga pamilya.
Kaibahan sa mga ginaproponer ro pagbutang it mas mahugot nga beripikasyon it identity, pag-usisa sa kakayahang pinansiyal it mga manug-hampang ag sistemang maga-limita sa pag-access it mga menor de edad sa mga online gambling application.
Ginapamilit man ni Marquez nga bukon it bastante nga una sa tamang edad na ro sangka tawo para pasugtan nga magsugae bangud importanteng masiguro sigon ro anang kakayahang pinansiyal. May mga pamilya man sigon nga posibelng mawad-an it kwartang nakataeana kunta sa pagkaon, edukasyon ag iba pang nagapangunang kinahangeanon bangud sa pagsusugal.
Ginpamilit man nana ro papel it mga patalastas ag content creator sa pagpaeapta it online gambling, kaya importanteng usisaon ro mga pamaagi it pag-promote kara.
Ginklaro man nana nga padayon gina-tun’an it Technical Working Group (TWG) ro mga proposisyong ngara antes ro pinal nga rekomendasyon.
