KALIBO, Aklan—Nakaeksperyensya eon it mainit nga panyempo ro US teritory nga Guam kasunod it pagpanaeasa it Typhoon Mawar ko nagtaliwan nga adlaw.
Suno kay Bombo International Correspondent Mary Grace Ines nga medyo nakabawi eon sanda sa pagpanaeasa it mabaskog nga bagyo.
Kapin sa tatlong oras imaw nga nagpila para eamang makapa-gas it saeakyan.
Nagbukas eon man ro mga grocery store ag iba pang establisyimento para sa mga kinahang-eanon it mga residente.
Ginpahayag dugang ni Ines nga uwa eon it dapat kabaeak-an ro andang mga himata nga iya sa Pilipinas bangud nga eowas sanda sa nasambit nga bagyo ag uwa it napabalitang namatay.
Raya hay kasunod it temprano nga abiso ag pagpahaom it tanan.
Nakabalik eon sa tagsa-tagsa nanda ka trabaho ro mga pumueoyo samtang nagapadayon ro clearing operation sa mga lugar nga apektado.
Nagpanawagan eon sigon ro gobyerno nga magsumite sanda it aplikasyon para makabuoe it ayuda.
Madumduman nga naeobog sa baha ro maabong lugar sa Guam, nag-eopad ro mga bubong it panimaeay ag nagtumbahan ro mga punong kahoy bangud sa bagyong Mawar.
Nagbuhay ro bagyo sa nasambit nga lugar it kapin sa onse hasta 12 oras.
