KALIBO, Aklan—Padayun nga nagaeaum si aklan 1st district congressman Carlito Marquez nga maeakip ro barangay Caticlan sa mainland Malay sa sakop it bag-o eamang gin-aprubahan nga pagbilog it Boracay Island Development Authority ukon BIDA nga nagatuyo nga mapadayun ro naumpisahan nga rehabilitasyon ag development sa isla.
Suno kana nga ro caticlan ro gateway paagto it Boracay rason nga dapat nga maeakip raya sa mga maka-benepisyo mag-eowas sa tatlong barangay it isla nga ginaeakipan it Yapak, Manocmanoc ag Balabag.
Gindugang pa ni Cong. Marquez nga sa caticlan man plano nga igatukod ro mga mabahoe nga infrastructure projects partikular ro dueungkaan it mga cruise ship.
Madumduman nga gin-aprubahan ko nagtaliwan nga domingo it committee on government enterprises and privatization ag local government ro House Bill No. 6214 nga pagagamiton nga “mother bill” para sa pagtukod it BIDA.
Ro kaparehong bill nga ginpasa nanda ni aklan 2nd district congressman ted haresco hay gintingub lang sa substitute bill nanday Davao City Rep. Paolo Duterte ag party list Representative Eric Yap it ACT-CIS ag Sandro Gonzalez it Marino.
Sa pagtukod it BIDA, raya hay pagakabigon nga government-owned and -controlled corporation ukon GOCC sa idaeum it pagdumaea it Office of the President, sa baylo nga sangka ahensiya it Department of the Environment and Natural Resources.
Pagatinguhaan sigon nanda nga maisingit ro nasambit nga suhestiyon sa pagbilog it technical working group.
Nasayuran nga ko 2018, ro Boracay hay ginpasaraduhan sa sueod it 6 nga buean agud nga mataw-an it daean ro paglimpyo ag rehabilitasyon matapos raya nga bansagan ni pangueong duterte bilang “cesspool” bangud sa problema sa palibot mag-eowas pa sa overdevelopment ag overcrowding nga isyu.
