Ro Centuripe hay sangka maisot nga banwa nga napatung-an it mga bukid sa Sicily, Italy.
Ginakabig raya nga “The balcony of Sicily” bangud sa nasambit nga banwa makita ro manami nga view it Mount Etna.
Apang ko raya eamang nga 2022 natukiban nga ro mismong banwa hay manami nga taean-awon kon pagatan-awon halin sa kaeangitan.
Natukiban it local photographer nga si Pio Andrea Peri ro tumaeagsahon nga korte it Centuripe gamit ro anang drone camera.
Suno kay Peri, una nana nga nataeupangdan nga korteng tawo ro anang banwa matapos nga makita raya sa Google Earth.
Agud nga mapamatud-an, gingamit nana ro anang drone ag nasorpresa imaw sa mga litrato nga anang nabo-oe.
Korteng tawo ro kabilugan it Centuripe ag masyadong kita raya sa camera eabi eon sa gabi-i.
Gin-post ni Peri ro mga litrato sa anang social media accounts ag insigida raya nga nag-viral sa Italian netizens.
Kaabuan sa anang mga kababayan sa Centuripe ro nakibot ag makaron eamang nasayuran nga ro andang banwa hay may unique nga korte.
Bangud sa viral photos, bumuhos sa Centuripe ro mga local tourists halin sa nagkaeain-eain nga parte it Italy.
Bilang pagpasaeamat it mayor it Centuripe kay Peri bangud nga nagbaskog ro turismo it anang maisot nga banwa, gintaw-an imaw it kahigayunan kara nga magpatindog it exhibit agud nga ipakita ro anang mga nabo-oe nga litrato.
