KALIBO, Aklan—Aktibong nagasuporta ro Makabayan bloc sa mga residente ag environmental defenders it Kasibu, Nueva Vizcaya nga nagasukoe sa mapanamad nga pagmimina.
Sa kamatuoran suno kay Kabataan Partylist representative Atty. Renee Louise Co nga nagdihon ro Makabayan bloc it House Resolution No. 1457 agud pormal nga paimbestigahan sa Kamara ro padayon nga harassment, red-tagging, ag serye it mga himo-himo nga kaso ukon Strategic Lawsuit Against Public Participation (SLAPP) cases kontra sa mga katutubo ag lokal nga lider sa Kasibu.
Ginpaathag pa it mamalidha nga ro mga nasambit nga kaso hay ginpasaka sigon it mga indibidwal nga may kaangtanan sa North Luzon Mineral Resources Corporation (NLMRC) agud nga boe-on it mga pumueoyo ro barikada nga nagaharang sa pagmina sa andang watershed area.
Nasayuran nga ro mining company nga NLMRC nga imbolbado sa mineral exploration sa Kasibu, Nueva Vizcaya nga suno sa Mines and Geosciences Bureau (MGB) hay may exploration permit application ro kompanya para sa gold ag copper exploration.
Apang, ginkondena raya ni Atty. Co bangud sa mapanamad nga pagmina nga nakaapekto sa pangabuhian ag propyedad it mga mangunguma ag mga katutubong pumueoyo.
